Stærðfræðin í Teigaseli

Stærðfræði

 

Stærðfræði er að finna alls staðar í starfi leikskóla og er hún samofin hinum ýmsu námsþáttum sem unnið er eftir samkvæmt Aðalnámskrá leikskóla. Undanfarin ár hefur orðið mikil hugarfarsbreyting í notkun stærðfræði innan leikskóla og augu fólks opnast fyrir því hvað nemendur eru móttækilegir fyrir undrum stærðfræðinnar.

Í Teigaseli hefur verið unnið með stærðfræði og stærðfræðihugtök frá því skólinn var stofnaður. Haustið 2005 hafði Ólöf Björg Steinþórsdóttir, lektor við University of North Carolina, samband við okkur. Hún óskaði eftir þátttöku okkar, ásamt leikskólanum Sjónarhóli, í rannsókn sem hún var að vinna að og fjallaði um stærðfræðikennslu byggða á skilningi barna. Sú kennsla byggir á margra ára rannsóknum um lausnaleiðir barna á þrautum tengdum samlagningu, frádrætti, margföldun og deilingu. Þetta er ekki námsefni heldur hugmyndafræði um kennslu og byggir á að auðvelda kennurum að skilja hugsun barna og lausnaleiðir þeirra. Það sem einkennir þessa hugmyndafræði er að námið er í formi þrauta. Þrautalausnir eru bæði markmið og meginleið í kennslunni. Kennarinn hvetur til eigin lausnaleiða og að nemendur finni nýjar leiðir. Búið er að skipa stærðfræðiteymi sem á að halda utanum stærðfræðikennslu í leikskólanum.

Þó stærðfræðin tengist mikið daglegu starfi, notum við einnig ýmis kennslugögn til stærðfræðikennslu sem eru ýmist keypt eða heimatilbúin, meðal annars:

 

  • Einingakubba
  • Numicon – kubba
  • Rökkubba
  • Sætisgildiskubba
  • Kapla kubba
  • Ýmis spil, s.s. Yatzy, bingó o.fl.
  • Talning í númeraða bakka
  • Talnagrind, notuð við ýmis verkefni
  • Flokkun eftir tölum, stærðum, litum og gerðum
  • Ýmis kennsluforrit o.fl.

 

Á elstu deildinni hefur skapast hefð fyrir því að gera ýmsar kannanir og má þar nefna ýmsar talningaaðferðir, sem nemendur taka virkan þátt í og tengjast þekkingar- og reynsluheimi þeirra. Dæmi um það eru: Götutalning, mætingakönnun og faratækjakönnun.

Hér í Teigaseli hefur á undanförnum árum orðið mikil þróun í notkun stærðfræðinnar í leik og starfi með börnum. Við erum sífellt að koma auga á nýjar leiðir til að kynna hana fyrir börnunum á jákvæðan og skemmtilegan hátt. Teljum við að þau búi að þessum grunni þegar að grunnskólagöngunni kemur.